自職業治療師上門為我哋做家居安全諮詢後，有幾個事項逐步為大bb準備和改善，一家人連同姐姐有商有量，為的是希望為大bb提供一個更加安全同舒適嘅居住環境。

首先出場嘅係大bb嘅寶座，呢張寶座坐咗差唔多六年，已經越坐越下墜，加上跌傷後大bb用腰力起身有困難，本打算換過一張較硬身嘅凳，但張寶座仲好新淨唔捨得棄掉，諗過唔同嘅方案… 感恩最後係無意中發現家品店有呢種「扶手懶人椅」， 加上去後簡直perfect!

大bb今日可以輕鬆自己起到身表示好開心~ 開心到不停講英文。 第一次試坐嘅時候，大bb展露久違超燦爛嘅笑容 （可惜錄唔到）。

頓時發現，老友記靠自己能力做到一啲我哋以為好簡單嘅事，原來係咁開心&滿足