壓瘡，現稱壓傷 (Pressure Injury)。引致壓傷的原因是皮膚受到持續性壓力、剪力、摩擦力，所導致皮下組織、真皮層、肌肉或骨頭受傷的情形。一般而言，壓傷的高危人士主要是行動不便，可能需要長期坐輪椅或卧床；進食不佳而引致營養不足的晚期病患者。
不過你又有冇諗過原來識行識走嘅認知障礙症患者都可能會出現皮膚壓傷呢種情況？
王婆婆同陳婆婆分別都係我跟進緊嘅中晚期認知障礙症患者。雖然病情已經踏入中晚期，喺生活上各自都有唔同嘅問題要處理同跟進，不過平日佢哋其實仍然可以以步行架或拐杖作短距離行走，而無需長期臥床或坐輪椅。
雖然佢哋都仲叫做「識行識走」，不過最近我就不約而同地發現兩位婆婆嘅腳踭部份都出現一啲紅印，而呢一啲紅印正正就係初期壓傷嘅徵狀（見圖）
識行識走點解會出現壓傷？細問家人後終於搵出真相。原因就係佢地平日瞓覺只會平卧，而且極少/甚至係唔會轉換睡姿，例如：側睡。
一般而言，認知障礙症患者嘅行動能力會喺中期開始慢慢退化，上述兩位婆婆平日在工具輔助下才可行走，行動力明顯已經出現缺失，所以喺床上瞓覺嘅時候，佢哋未必可以好似我哋咁靈活轉身或轉換其他姿勢，喺長期平瞓嘅情況下，腳踭等地方就會持續受壓，繼而引致壓傷嘅情況。
上門跟進呢班認知障礙症老友記，除咗要處理佢哋嘅認知情況外，我哋同時亦跟進住佢嘅生活狀況，無論係家居安全；慢性病處理及預防；以致家人之間的關係同誤解，我哋都會一一處理。就以陳、王兩位婆婆為例，好彩我發現果陣仍屬於早期階段，皮膚未有出現破損，相信採取適當嘅措施去處理後，下星期再見佢哋情況已經會有所改善啦。
