認知障礙症照顧策劃師手記 | 《請個外傭姐姐=乜問題都搞決晒⁉️》


「嘩,乜你哋收費咁貴!咁我不如用筆錢請個姐姐好過啦!」呢句說話由我哋開業到而家,聽過不下數十次😆

好多照顧者為咗令家中腦友記得到更貼身嘅照顧,而聘請外傭照顧佢哋日常需要。但其實屋企有咗姐姐,係咪就係等如係對腦友記最好嘅安排,同埋解決晒所有問題?🙈

部分照顧者聘請姐姐前,以為有咗姐姐就等於患者得到足份嘅照顧,每日問題就會更少。🤔但可惜嘅係現實狀況中,由於外傭無足夠對應認知障礙症嘅認識同照顧技巧,而在患者眼中外傭完全係一個陌生人,心入面好多時會產生排斥😥如果呢個時候家中照顧者又無提供足夠的支持,外傭同腦友記嘅相處就會更加困難同混亂,反而引發患者行為問題、情緒不穩、甚至會產生攻擊行為,而當外傭承受唔到照顧壓力,自然就會選擇離開🫠而好多時照顧家庭就只可以再重新招聘新姐姐,不斷重複🥺最後,除咗解決到患者基本生理需要外,反而腦友記行為或情緒問題更見惡化😭

聽完我哋咁講,係咪即係請姐姐係咪絕對唔好?當然唔係❌只要照顧者同姐姐有良好嘅溝通,同埋調整自己嘅心態,姐姐都可以絕對成為照顧好幫手😚以下就係一啲關於外傭照顧腦友記嘅小貼士:

💡首先,第一點係最重要嘅一項❗️照顧者需要確立一個清晰嘅態度:腦友記係您嘅家人,但並唔係外傭嘅家人,所以一開始千萬唔好假設外傭一定用你嘅角度去照顧及關愛腦友記。要清楚知道,最大照顧及訓練主導角色及責任始終在於家人,而外傭係輔助角色幫助日常生活需要及訓練🤓

💡當外傭新嚟到家中開始工作,由於語言不同嘅關係,僱主可以提供寫有記錄患者日常習慣、喜好的事物、飲食習慣、生活日程、認知障礙症病徵等等的筆記或圖文冊,令姐姐可以更快及準確掌握到患者嘅需要🍚🥢😴除此以外,外傭可以透患者鍾意嘅事物及喜好,加快患者接受外傭嘅過程,增加親切感🥰

💡由於認知障礙症患者適合一個有規律嘅生活日程,為咗令外傭更容易跟從固有嘅習慣,僱主可以定下每日生活時間表,令外傭及患者可以磨合得更快😀

💡由於大部分外傭都無關於照顧認知障礙者嘅知識及訓練,所以雇主可以準備一啲日常訓練或遊戲,指示姐姐指導患者進行訓練,例如:教導姐姐如果實踐「現實導向訓練」,包括透過交談及於家中使用大掛牆日曆、大時鐘、大標貼等重要標示,指示姐姐每日不停重覆及詢問患者不同資訊:日期、時間、地點、天氣、節日、食物、日用品等,幫助患者更準確地掌握四周發生的事情😄

💡有啲照顧者會問,點解姐姐同患者相處十分融洽,但係患者情況會每況越下呢?🥺原因就係:姐姐就係對患者太好了!🙈有時侯,外傭及僱主因為覺得患者能力有限,所以咩都會幫患者做晒。但其實相反地,僱主應該教導外傭加強患者嘅自我照顧訓練,例如:鼓勵患者進行能力以內嘅日常活動,包括進食、洗面刷牙、穿衣、洗澡、簡單家務等,外傭可從旁給予適當嘅協助,增加患者自理的意識同自主性,避免過份依賴,導致能力衰退,亦可以從而得到成功感及滿足感💪🏻

💡好多時外傭都會每日帶患者到街外散步,吸收下陽光,鬆下筋骨。但如果老友記行動力一般,僱主應該給予外傭扶抱/轉移技巧,避免令患者跌倒。我哋亦十分建議僱主為患者佩置防走失器,以防患者喺姐姐一不留神嘅時候走失,都可以迅速搵到患者行蹤。

💡最後,亦係其中一個重點💕照顧認知障礙症患者從來都唔輕鬆,任何人都需要休息及釋放情緒😎僱主喺適當時候應給予姐姐空間唞唞氣及放鬆,釋放繃緊嘅情緒~休息係為咗走更遠嘅路呢🥰

雖然聘請外傭唔可以代替專業認知訓練,但一個幫到忙照顧家中腦友記嘅姐姐,係家中不可多得嘅一份子,絕對可以令腦友記嘅訓練事半功倍💪🏻💪🏻💪🏻所以,如果你屋企有個好好嘅姐姐,就要好好珍惜同埋加強溝通喇💕

Zoe & Alvin
耆俠會創立人,認知障礙症照顧策劃師。醫護夫婦;香港註冊護士及職業治療師,以同行者身份致力幫助認知障礙症患者及家人,在患病的旅途上提供支援、治療和意見。

這篇文章對你有幾大幫助呢?