穿鞋、著襪、外出閒逛，看似簡單的事對中風人士也不容易，陳婆婆中風後，經過一年多的治療及訓練，才做得到。她的女兒Happy，在媽媽中風後也隨即辭工，專心照顧媽媽，惟全身投入照顧後，因缺乏照顧經驗及技巧，一度令她質疑自己無能力照顧好媽媽。直至參與中風復康計劃，有跨專業團隊的支援，她才掌握照顧技巧，能協助媽媽由床上轉移到輪椅，一同外出；陳婆婆在持續進行治療及訓練下，活動能力也逐步提升，現時能夠用四腳叉、在旁人輔助下步行。
復康路上，兩母女雖時有分歧及爭拗，但開始找到共識，Happy去年4月亦開始重返職場，近來也短暫離港旅行。計劃團隊表示，想復康的路行得好，被照顧者及照顧者都佔重要角色，所以不只要着眼於中風人士，也要照顧照顧者，「我哋都係想幫到佢哋兩者都可以盡量，貼近返佢哋以前嘅一啲嘅生活模式。」
不欲把中風母送院舍：好似無意中放棄咗佢
Happy今年40多歲，2022年初媽媽中風，她二話不說辭職照顧，親友建議過不如安排媽媽入住院舍，但她不願意：「我覺得好似佢咁嘅狀態，入咗去（院舍）時，好似無意中放棄咗佢咁，我自己個心都係試咗（回家照顧）先，唔得先再算。」
她憶述，媽媽中風入院時，正值第五波疫情，後來在醫院感染新冠，轉送到定點醫院，她一直都未能親身探望，直至出院兩母女才能碰面，「嘩，啲手直頭甩晒皮，好似乾晒咁，個人好似好無嚟神氣，唔識點形容，總言之見到好心痛。」
全天候照顧不易 母見女兒辛苦照顧自覺拖累
全天候照顧不容易。Happy的媽媽陳婆婆今年72歲，中風前喜歡跟朋友飲茶、游水、更有一張迪士尼年卡，閒時會跟朋友去玩；中風後，她經常臥床，難以接受身體及生活的改變，又想到女兒要辭職照顧自己，自覺拖累女兒，情緒低落，有很多負面想法。至今提起，陳婆婆仍忍不住落淚：「諗住快啲死、快啲死，成日都諗。」
壓力及疲憊困擾：企喺到都瞓得著
Happy知道媽媽有情緒，於是更落力照顧，「佢要啲咩就拎畀佢，咁佢咩都做唔到，但佢個人又好急，所以你係處於一個唔停手。」但隨之而來的，是壓力及疲憊：「最初嗰陣時，就係可能無時間瞓教，去到一個階段，你企喺到都瞓得著。」
未能掌握扶抱技巧 一度質疑無法照顧好媽媽
她續指，媽媽回家後一直臥床，即使有上網看影片學，仍未能掌握扶抱及位置轉移的技巧，扶媽媽坐起、幫媽媽從床上轉移到輪椅、去浴室洗澡這些事，都只能等到醫院離院支援的團隊上門協助才做得到，令她一度質疑自己無法照顧好媽媽。
「去到一個位，你係成個月，佢都落唔到床，即係我係無辦法去，譬如過櫈，呢個位就令到我去反思，到底我係咪無能力去照顧佢呢？因為你係院舍，人哋就算郁唔到，都會坐起身食嘢，坐落櫈食嘢，但我喺屋企完全做唔到。」
▸▸▸繼續閱讀 母中風女辭工照顧感壓力與無力 跨專業支援重拾生活質素(二)
中風復康計劃為中風人士提供及時和個別復康訓練，加強他們獨立處理日常生活的能力及支援他們及其照顧者的心理需要。
電話：3974 4624
電郵：[email protected]
- 資料來源：聖雅各福群會 中風復康計劃 及 HK01報道