我媽最近住咗院，因為耳仔發炎得好嚴重，加埋頭皮又痕又損，情況真係唔太理想。佢成日話痕到頂唔順，成日用手R，R到耳仔流血，頭皮都抓損晒。姑娘已經幫佢清洗傷口，用咗生理鹽水，再搽藥膏，但佢仲係話好痕，我唯有幫佢搽軟凡士林，希望可以舒緩啲。
而家最擔心就係佢繼續抓會令傷口惡化，想問下大家有冇啲止痕又唔刺激皮膚嘅產品可以推薦？另外有冇啲方法可以令傷口快啲癒合？佢而家喺醫院都唔太舒服，希望可以搵啲方法令佢好返快啲 🙏🏻

媽媽六月底做咗一個大手術，醫生話手術本身算成功，但康復進度一直唔理想。因為血色素持續偏低，擔心有內出血，最近安排咗住院幾日做大腸鏡。結果檢查冇發現問題，但反而住院期間佢身體狀況急轉直下。
而家佢雙腳冇力，連企都企唔穩，雙手震到揸唔穩杯，講嘢少咗好多，仲開始失禁。以前仲肯食啲軟餐、飲湯，而家乜都唔肯食，餵佢都會吐返出嚟，連飲水都會濁親。成日瞓，唔願郁，狀態好似一日比一日差。
呢段時間我哋睇過公立、私家醫生，各科都話冇大問題，但佢明顯係愈來愈虛弱。我冇放棄，上星期仲帶佢睇咗個新嘅私家老人科，醫生懷疑有情緒問題，開咗抗抑鬱藥。不過藥都未食穩，就俾住院打亂晒。
呢兩日見佢身體機能一個一個咁消失，我真係唔知仲可以做啲乜，心好痛，好無力。💔

媽媽中風之後吞唔到口水，姑娘話要插鼻胃喉。我嗰陣真係唔知可以做啲咩，醫院又冇安排復康，只係隔一排做評估，吞唔到就繼續插。
媽媽成日話想食嘢，叫我俾啖水佢飲，但我唔敢俾，驚會嗆親。見到佢咁，我心入面好唔舒服。
後尾我搵咗個私人言語治療師，每日幫佢練吞嚥。慢慢地，佢開始食到糊仔，而家可以食剪細咗嘅飯，雖然要慢慢嚟，但已經唔使插胃喉。
如果你屋企人都有吞嚥問題，可以試下搵治療師幫手，唔好太快放棄。

爸爸跌親之後一直臥床，知道要轉身防止褥瘡，但佢側身都話痛，搞到我哋唔敢郁佢太多。最近發現佢尾龍骨有啲紅腫，仲有啲滲水，唔知係咪已經開始潰爛。我哋用緊氣墊床，但唔知夠唔夠。有冇人試過咁？可唔可以沖涼？定係要搵姑娘上門處理？真係唔知點算好。

媽媽做完手術，姑娘話要臥床休息，但佢成日話背脊痕、皮膚乾。我探病時會幫佢抹下身，但唔知可唔可以搽啲潤膚膏？驚醫院唔俾用自己帶入去嘅護膚品，又唔知邊啲成分係安全。有冇人試過咁？你哋係點樣幫住院病人處理皮膚乾燥問題？

奶奶有少少認知障礙，姑娘話做下運動可以幫助佢保持活動力。但佢成日唔記得做，我提佢又話「做咗啦」，但其實冇做。我唔想搞到佢唔開心，有冇人試過用音樂、遊戲或者其他方法令老人家肯郁下身？唔一定要好激烈，只係想佢唔好退化得咁快。

爸爸九十歲，腎功能得返好少，佢話唔想洗腎，怕辛苦。我哋唔忍心逼佢，但又聽人講，唔洗腎唔係自然走咁簡單，可能痛到腳抽筋、行唔到，要急插喉洗腎先頂得住。

洗腎又唔係冇代價，要成日返醫院、照顧者要做多好多嘢，仲有副作用。我同細佬意見唔同，佢想救到底，我就想尊重爸爸感受。

想問大家：唔洗腎係咪真係會痛到走唔到？舒緩治療係咪真係可以止痛？定係有啲痛係止唔到？揀咗舒緩之後，仲可唔可以轉返洗腎？

唔想佢痛走，但又唔想佢辛苦洗腎🙏