早plan都好

好多時見到有照顧者喺討論區話好急要搵老人院，字裡行間都感受到家人幾徬徨担心。其實好多長者疾病，尤其係腦退化症，病情通常係慢慢發展，唔係一日之間就突然完全失去自理能力，照顧安排其實可以早啲諗定、早啲部署。如果屋企人知道自己未必可以由頭照顧到長者百年歸老，又或者長者本身有長期病、將來功能可能一路退化，喺佢仲有一定自理能力嘅階段，已經可以開始了解政府資助院舍嘅輪候情況，諗埋將來有冇需要申請、或者預先排隊。

唔少院舍輪候時間都唔短，提早做兩手準備，等真正需要入住嘅時候唔使咁手足無措，亦可以同長者商量、尊重佢意願，一齊決定最啱嘅照顧安排。